شنو هي دراسة السوق؟
أي واحد بغا يبدا شي مشروع كيسمع بدراسة السوق، شنو هي دراسة السوق؟
بكل بساطة دراسة السوق هي اللي كتخليك تحدد الفئة ديال الناس اللي خصك تستهدفهم باش تبيع لهم السلعة أو الخدمات ديالك،
دراسة السوق كتخليك تعرف بزاف ديال التفاصيل على السوق اللي انت ناوي تدخل ليه، وهادشي كيخلك تاخد قرارات سليمة اللي كتعاون المشروع ديالك اكون ناجح
شنو غادي يوقع إلى بديت المشروع ديالي بلا ماندير دراسة السوق؟
بدون دراسة السوق صاحب المشروع مكتكونش عندو معطيات صحيحة، وغالبا مكيتاخد قرارات مبنية على القراءة الشخصية ديالو للسوق اللي غالبا ماكتكون خاطئة.
مزيان! حتى لهنا واضح المفهوم ديال دراسة السوق، إوا أجي نتعمقوا شوية باش نعرفو فاش يقدر ينفعنا دراسة السوق.
دراسة السوق كتنفعنا في بزاف ديال الأشياء من بينها:
1- كتمكن صاحب المشروع اللي هو أنت أنك تكتشف بعض الفجوات والفرص اللي مكتاشفوهاش المنافسين ديالك أو منتابهوش ليها وهادشي كيخليك تفوق على المنافسين ديالك.
2- من خلال الدراسة ديالك ممكن تكتشف شرائح جديدة من العملاء اللي ماسبقش التعامل معها
3- كتخليك تعرف حجم العرض والطلب بالنسبة للمنتجات أو الخدمات اللي غادي تقدمها للعملاء ديالك.
4- كتقدر أنك تعرف حتى الأسعار اللي كاينة في السوق، فملي كتبغي تحط أتمنة ديال المنتوجات ديالك فغادي تكون أثمنة طبيعية، يعني ماشي أتمنة اللي غالية اللي مغاديش تشجع الكليان أنه اشري ولا رخيصة اللي تخلي الكليان يشك في جودة المنتوجات ديالك.
المعلومات اللي خاص تكون عندك على دراسة السوق كلها عرفتيها،، دبا بقات حاجة وحدة هي كيفاش دير دراسة السوق، ساهلة ماعليك غيرتجاوب على هاد الأسئلة:
-
شكون هي الشريحة ديال الكليان اللي غادي تبيع لهم السلعة أو الخدمة ديالك؟ شنو هي الإهتمامات ديالهم، العمر ديالهم.....؟
-
شكون هما المنافسين ديالك وشنو هي نقط القوة والضعف ديالهم؟
-
واش كين شي أبحاث جديدة على السوق اللي تقدر تعتمد عليها؟
من بعد ماقريتي المقال غادي تكون عرفتي الأهمية ديال دراسة السوق، إلا باقي مدرتيش دراسة السوق لمشروع ديالك فهادي هي الفرصة باش تضمن نجاح المشروع ديالك.